धनगढी, २० पुस/सुदूरपश्चिम प्रदेशमा बढ्दो सवारी दुर्घटनालाई न्यूनीकरण गर्ने उद्देश्यले कैलालीका विभिन्न स्थानमा ‘ब्ल्याक स्पट जोन’ बोर्डहरू स्थापना गरिएको छ।

सुदूरपश्चिम प्रदेश प्रहरी कार्यालय धनगढी तथा नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरियाको निर्देशनअनुसार ट्राफिक प्रहरी कार्यालय लम्की मातहतका १० वटा ट्राफिक प्रहरी पोष्टहरूले आ–आफ्नो वडा क्षेत्रभित्र बढी सवारी दुर्घटना हुने स्थानहरू पहिचान गरी ब्ल्याक स्पट जोन बोर्डहरू राखिएको जिल्ला ट्राफिक प्रहरी कार्यालयका ईन्चार्ज प्रहरी निरिक्षक चक्र देउवाले जानकारी दिए ।

यस अन्तर्गत ट्राफिक प्रहरी कार्यालय लम्की, अस्थायी ट्राफिक प्रहरी पोष्ट हसुलिया, सुख्खड, फुलबारी, हरिनगर, स्याउले, गोदावरी, गेटा, राजपुर र खानिडाँडामा ब्ल्याक स्पट जोन बोर्ड स्थापना गरिएको ट्राफिक प्रहरीले जनाएको छ।

ब्ल्याक स्पट जोन बोर्ड स्थापनासँगै ती स्थानहरूमा सवारी चालक तथा यात्रुहरूलाई सचेत गराई सवारी गति नियन्त्रण, ट्राफिक नियम पालना तथा सावधानी अपनाउन प्रेरित गर्ने अपेक्षा गरिएको छ। ट्राफिक प्रहरीका अनुसार आगामी दिनमा पनि दुर्घटना न्यूनीकरणका लागि जनचेतनामूलक कार्यक्रम, सवारी चेकजाँच तथा अनुगमनलाई थप प्रभावकारी बनाइने निरिक्षक देउवाले बताएका छन् ।