नयाँ तथा युवा पुस्ताका गायक चक्रबम सुदूरपश्चिमको माटोले फुलाएको एक मात्र फूल होइनन् । उनी त त्यो फूलको सुवास हुन्, जसले सिंगो भूगोललाई सुगन्धित बनाइरहेको छ। सुदूरपश्चिमको पहाड, तराई, खोला, खेत र पसिनाको कथा बोकेको यो माटोले जन्माएको स्वर आज केवल गीतमा सीमित छैन, यो त पहिचानको आवाज बनेको छ।

आज १९औँ सुदूरपश्चिम महोत्सवको अवसरमा धनगढीको महोत्सव प्राङ्गणमा चक्रबम जब मञ्चमा उक्लिए, त्यो केवल एक कलाकारको आगमन थिएन, त्यो त हजारौँ दर्शकको भावनात्मक पुनर्मिलन थियो। बालकदेखि वृद्धसम्म, विद्यार्थीदेखि श्रमिकसम्म, महिला–पुरुष सबैको आँखामा एउटै चमक देखिन्थ्यो ।

मञ्चमा चक्रबमको पहिलो स्वर गुन्जिन नपाउँदै महोत्सव प्राङ्गणको वातावरण बदलिन थाल्यो। सुर, ताल र लय केवल बाजामा सीमित रहेनन्, ती दर्शकको शरीर र मनभित्र प्रवेश गरे। जोशले भरिएका दर्शक हल्लिन थाले, नाच्न नजान्ने पनि नाचे, गाउन लजाउने पनि स्वरमा स्वर मिलाउन थाले। हजारौँ दर्शक एकै ताल, एकै लयमा झुम्मिन थालेको दृश्यले महोत्सव प्राङ्गणलाई साँचिकै जीवित बनाइदियो। त्यो क्षणमा चक्रबम केवल गायक थिएनन्, उनी त दर्शकका भावनाका सारथि बनेका थिए।

चक्रबमका गीतहरू मनोरञ्जनका साधन मात्र होइनन्, ती सुदूरपश्चिमेली जीवनका दस्तावेज हुन्। उनका शब्दमा दुखाइ छ, तर आशा पनि छ; संघर्ष छ, तर आत्मसम्मान पनि छ। गाउँबाट शहरसम्मको यात्रा, रोजगारीको पीडा, माटोप्रतिको माया, संस्कृति र मौलिकताको गर्व, यी सबै कुरा उनका गीतमा स्वाभाविक रूपमा मिसिएका छन्। सायद यही कारण हो ; उनका गीत सुन्दा दर्शकले आफूलाई नै देख्छन्, आफ्नै कथा सुन्छन् र आफ्नै भावना भेट्छन्।

सुदूरपश्चिम महोत्सवमा देखिएको त्यो भीड केवल लोकप्रियताको प्रमाण मात्र थिएन। त्यो चक्रबमप्रतिको गहिरो विश्वास र अपनत्वको प्रतिबिम्ब थियो। जहाँ जहाँ चक्रबम पुग्छन्, त्यहाँ केवल मञ्च भरिँदैन, मनहरू पनि भरिन्छन्। सुदूरपश्चिमका मेला–महोत्सव मात्र होइन, देशका कुनाकन्दरा, शहरका हल र खुला मञ्चहरूमा पनि उनीप्रतिको लगाव उत्तिकै देखिन्छ।

चक्रबमको सफलताको मूलमा केवल आधुनिक संगीत वा लोकप्रियता छैन, त्यसको केन्द्रमा मौलिकता छ। उनी सुदूरपश्चिमको भाषा, भाका र संस्कृतिलाई आत्मसात् गरेर नयाँ पुस्तासँग जोड्न सफल भएका छन्। परम्परा र आधुनिकताको सन्तुलन मिलाएर अघि बढ्नु सजिलो हुँदैन, तर चक्रबमले यही कठिन बाटो रोजे र सफल पनि भए। उनले प्रमाणित गरिदिएका छन्। आफ्नो माटोलाई माया गर्दै पनि राष्ट्रिय स्तरमा पहिचान बनाउन सकिन्छ।

आज सुदूरपश्चिमका युवाहरू चक्रबमलाई केवल गायकका रूपमा होइन, प्रेरणाका रूपमा हेर्छन्। उनीहरूका लागि चक्रबम आशाको नाम हो, सम्भावनाको संकेत हो। “हामी पनि सक्छौँ” भन्ने आत्मविश्वासको स्वर हो। सुदूरपश्चिम जस्तो भौगोलिक र संरचनात्मक चुनौती भएको क्षेत्रमा जन्मिएर पनि राष्ट्रिय स्तरमा चम्किन सकिने उदाहरण चक्रबम बनेका छन्।

१९औँ सुदूरपश्चिम महोत्सव आजको  साँझ धेरैका लागि अविस्मरणीय बन्यो। गीत सकिए पनि ताल सकिएन, कार्यक्रम सकिए पनि भावना सकिएन। दर्शकको मनमा एउटै निष्कर्ष थियो। चक्रबम केवल कलाकार होइनन्, उनी सुदूरपश्चिमेलीको शक्ति हुन्, गौरव हुन्।