काठमाडौँ । गएको १५ चैत शुक्रबारका दिन राजधानीमा आयोजित राजावादीहरूको प्रदर्शनका क्रममा भएका आपराधिक गतिविधिको अनुसन्धान गर्न प्रहरीले फोटो भिडिओ लगायतका विवरण उपलब्ध गराउन आग्रह गरेको छ । आइतबार एक सूचना प्रकाशित गर्दै प्रहरी प्रधान कार्यालयले यस्तो आग्रह गरेको हो ।

त्यस दिन काठमाडौँको तीनकुने क्षेत्रमा दुर्गा प्रसाईंको कमान्डमा राजावादीहरूले आयोजना गरेको विरोध सभाले अनियन्त्रित रूप लिएको थियो । त्यस क्रममा तीनकुने, कोटेश्वर, सिनामङ्गल, जडिबुटी लगायतका विभिन्न क्षेत्रहरूमा निजी सम्पत्ति, प्रहरी कार्यालय, सञ्चार गृह, राजनीतिक दलका कार्यालय व्यापारिक केन्द्र लगायतका निजी तथा सरकारी सवारी साधनहरूमा तोडफोड, आगजनी र लुटपाटका घटना भएका थिए ।

यस क्रममा एक जना पत्रकार सहित दुई जनाको ज्यान गएको छ भने प्रहरी र आन्दोलनकारी दुवैतर्फ गरी दर्जनौँ घाइते भएका छन् । “यस लगायत अन्य गैरकानुनी आपराधिक गतिविधिमा संलग्न व्यक्तिहरूका सम्बन्धमा अनुसन्धानको प्रमाण सङ्कलनका लागि यहाँहरूसँग भएकातथ्यपरक सूचना  फोटो, भिडिओ, संलग्न व्यक्तिको विवरण० उपलब्ध गराई अनुसन्धानमा सहयोग गरिदिनु हुन अनुरोध छ,” प्रहरीले भनेको छ, “सूचना र सूचनाकर्ताको गोपनीयता कायम रहने व्यहोरा जानकारी गराउन चाहन्छौँ ।”

यसका लागि नेपाल प्रहरीलाई [email protected] मा ईमेल गर्न वा तलको क्यूआर कोड स्क्यान गर्न सकिनेछ ।