लबदेव धामी
धनगढी, ३ फागुन /  १० औँ राष्ट्रिय खेलकुद प्रतियोगिताका लागि सुदूरपश्चिम प्रदेशमा खेलाडी छनौट प्रतियोगिता गरिएको छ। कर्णाली प्रदेशमा हुने भनिएको दशौं राष्ट्रिय खेलकुद प्रतियोगिताको लागि सुदूरपश्चिम प्रदेश खेलकुद परिषदले जिल्लाबाट छनौट भएका खेलाडीको सहभागितामा प्रदेश छनौट प्रतियोगिता सम्पन्न गरेको हो।

खुदूरपश्चिम प्रदेश खेलकुद परिषद्ले सञ्चालन गरेको प्रदेश स्तरीय छनौट प्रतियोगितामा अधिकांश खेलका खेलाडी छनौट भएका छन् । भलिबल खेल र फुल कन्ट्याक्ट कराते छनौटमा भने विवाद सिर्जना भएको छ।

विवाद सिर्जना भएको खेलमध्ये फुल कन्ट्याक्ट कराते छनौट प्रतियोगिता पनि एक हो। कराते छनौटमा सुदूरपश्चिमका फुल कन्ट्याक्ट करातेका संयोजक पुष्पलाल रोकाया र सुदूरपश्चिम प्रदेश खेलकुद परिषद्का सदस्य सचिव दिपक सिंहको एकाधिकारका कारण बैतडी, डडेलधुरा, डोटी ,बाजुरा ,कञ्चनपुर र कैलालीका केही खेलाडी र प्रशिक्षकको टोलीले खेल बहिष्कार गरेका छन्। संयोजक रोकायाले मनोमानी गर्दै सुदूरपश्चिममा निर्णायक हुँदाहुँदै पनि बाहिरबाट निर्णायक बोलाएको सँगै बझाङका खेलाडीलाई जिताउने उद्देश्यले अन्य जिल्लाका खेलाडीप्रति देखाएको सौताने व्यवहारले गर्दा आफूहरूले खेल बहिष्कार गरेको खेलाडी र प्रशिक्षकहरूको भनाइ रहेको छ।

यता दशौँ राष्ट्रिय खेलकुद प्रतियोगिताको मिति अझैसम्म टुङ्गो नलागेको अवस्थामा सुदूरपश्चिम प्रदेश खेलकुद परिषद्का सदस्य सचिव दीपक सिंहको जम्मा २८ दिन मात्रै कार्यकाल रहेकाले आफ्नै कार्यकालमा प्रतियोगिता सकेर बजेट सक्ने हिसाबले छनोट प्रतियोगिता गर्न हतार गरेको पनि करातेका केन्द्रीय प्रशिक्षक वीर कृष्ण महर्जनले आरोप लगाए।

खेलाडी छनौट एकलौटी ढंगले कसैसँग सहकार्य नगरी विगतमा राष्ट्रिय मेडल जितिसकेका खेलाडीहरूलाई समेत निरुत्साहित गर्दै गरेको यो खेलाडी छनौटलाई आफूहरूले कुनै हालतमा स्वीकार नगर्ने भन्दै कञ्चनपुर ,डडेलधुरा, बैतडी, डोटी, बाजुरा र कैलाली जिल्लाका समेत गरी प्रशिक्षक र खेलाडीहरूले बहिष्कार गरेका छन्।

यता सुदूरपश्चिम खेलकुद परिषद्का सदस्य सचिव दीपक सिंहलाई उक्त खेल विवादको विषयमा सोधपुछ गर्दा बझाङमा बाहेक अन्य कुनै जिल्लामा पनि फूल कन्ट्याक्ट कराते संघ दर्ता नभएको हुँदा विवाद सिर्जना भएको बताए। सुदूरपश्चिमका कुनै पनि निर्णायकसँग लाइसेन्स नहुँदा बाहिरबाट निर्णायक मगाएको सँगै अन्य जिल्लाका अधिकांश खेलाडी बाहिरका र प्रशिक्षक समेत बाहिरका भएकाले विवाद भएको उनको भनाइ छ।

खेलमा राजनीति घुसाएको प्रसङ्गमा सदस्य सचिव सिंहले भने कुनै पनि खेलाडी मेरो पार्टीको अथवा मेरो छैन जुन खेलाडीले राम्रो खेलिरहेको छ त्यही खेलाडी छनौट भएको बताए। साथै आफ्नो कार्यकाल २८ दिन बाँकी रहनुमा खेलसँग कुनै सरोकार नरहेको समेत जिकिर गरे।

खेलकुद परिषदले यत्रो लगानीमा गरेको खेलाडी छनौट कसैले विवाद गरेर केही पनि नहुने उनको तर्क रहेको छ ।