बैंकक : थाइल्याण्डका दुई रेष्टुरेण्ट मालिकलाई समुद्री खानाको गलत प्रचार गर्दै उपभोक्तालाई ठगेको भन्दै ७२३ वर्ष जेल सजाय सुनाइएको छ ।

अपिचर्ट बोवोर्नबन्चरक र प्रापसर्न बाओर्नबानले आफ्नो रेष्टुरेण्टमा अत्यन्त न्युनतम मुल्यमा बिक्री गर्नुपर्ने सि फूडलाई उनीहरुले महंगोमा बिक्री गरेका थिए । सोही अनुरुप उनीहरुले विज्ञापन गरेका थिए ।

सयौँ उपभोक्ताको अत्याधिक गुनासोपछि उनीहरुविरुद्ध मुद्दा दायर भएको थियो । ‘यस्तो उच्च गुणस्तरीय चिज विज्ञापन गरिए जस्तो बिक्री गर्नु सम्भव नै थिएन,’ उनीहरुले अदालतमा वयान दिएका थिए ।

साथै विज्ञापनमा भनिए जस्तो शर्त पालना गर्ने कुनै अवस्था नभएको पनि उनीहरुले बताएका थिए । अपिचर्ट र प्रापसर्न गत सेप्टेम्बरमा नै पक्राउ परेका थिए । हालसम्म पनि उनीहरु रिहा भएका छैनन् ।

उनीहरुको मुद्दामा फैसला हुने क्रममा अदालतले यति लामो जेल सजाय तोकेको हो । अदालतले खास अवस्थामा लामो समय जेल सजाय तोक्ने गर्छ । तर कानुनी रुपमा २० वर्ष भन्दा लामो समय सजाय भुक्तान गर्नु पर्दैन । उनीहरुले आत्मालोचना गरेपछि १४४६ वर्षबाट छोट्याइएको हो । साथै उनीहरुलाई १८ लाख ७ हजार ५ सय भाट जरिवाना पनि तोकिएको छ ।