धनगढी विमानस्थल आजदेखि पूर्ण रुपमा सञ्चालनमा आएको दावी गरिएपनि २१ दिन फेरी आशिंक बन्द हुने भएको छ। आज विहान मात्रै कुरा गर्दै धनगढी विमानस्थलका प्रमुख तेजवहादुर बुढथापाले एक महिनादेखि आशिंक बन्द रहेको विमानस्थल आजदेखि पूर्ण रुपमा सञ्चालन भएको दावी गरेका थिए।

मर्मत सम्भार र स्तरबृद्धिको काम जारी रहे पनि आजदेखि विमानस्थल पूर्ण रुपमा सञ्चालन हुने दावी उनको थियो। तर अहिले आएर फेरी २१ दिन सम्म विमानस्थल आशिंक बन्द रहने जानकारी आएको हो। विमानस्थल पूर्ण रुपमा सञ्चालनमा आएपछि विमान कम्पनीहरुले धनगढीबाट हुने नियमित हवाई उडानका लागि तयारी गरेपछि फेरी २१ दिन सम्म आशिंक बन्द हुने जानकरी गराईएको हो।

विमानस्थलका प्रमुख बुढथापाले यसअघि आज सम्मका लागि मात्रै आशिंक रुपमा बन्द गरिएकोमा थप २१ दिनको लागि फेरी आशिंक रुपमा बन्द गर्ने निर्णय केन्द्रबाटै भएको बताए। धनगढी विमानस्थल निर्माण आयोजनाका प्रमुख रत्नबहादुर श्रेष्ठले पनि २१ गते सम्म विमानस्थल आशिंक रुपमा बन्द रहने जानकारी दिए।

उनले चिसोका कारण रातीको समयमा काम गर्न सकिने अवस्था नरेकोले अन्तिम पटकका लागि २१ गते सम्म विमानस्थल आशिंक बन्द गर्ने निर्णय भएको बताए। उनका अनुसार विमानस्थल २१ दिनका लागि दिउँसो तीन देखि बिहान ७ बजे सम्म बन्द हुने छ।

नेपाल नागरिक उड्यन प्राधिकरणका अनुसार धनगढी विमानस्थलमा अहिले ६० मिटर चौडाई र १८ सय मिटर लम्वाईको कालोपत्रे धावनमार्ग छ। झण्डै २२ करोडमा धावनमार्गमा थप कालोपत्रे गरिने छ भने दुवैतर्फ २÷२ मिटर धावनमार्ग फराकिलो बनाउने योजना रहेको छ।

यस्तै अहिले ३ वटा जहाज पार्कीङको व्यवस्था रहेकोमा अव थप एक जहाज पार्कीङ गर्न सक्ने गरि पार्किङ क्षेत्र विस्तार योजना रहेको छ। यसअघि जेठमा पनि विमानस्थल मर्मत सम्भार र स्तरबृद्धिका लागि भन्दै एक महिना बन्द गरिएको थियो।