सुदूरपश्चिमकै गौरवको आयोजनाका रुपमा रहेको ब्रह्मदेव–दार्चुला महाकाली लोकमार्ग (महाकाली कोरिडोर) को वातावरण प्रभाव मुल्यांकन (इआइए) प्रतिवेदन तयार भएको छ । निर्माण शुरु भएको १० वर्षपछि महाकाली कोरिडोरको इआइए प्रतिवेदन तयार भएको हो ।
कञ्चनपुरको ब्रह्मदेवदेखि डडेल्धुरा, बैतडी, दार्चुला हुँदै तिंकर जोड्ने महाकाली कोरिडोरको निर्माण कार्य २०६६ सालबाट शुरु भएको थियो । जियोसिइ कन्सल्टेन्ट्स प्रालि तथा युनिक इन्जिनियरिङ कन्सल्टेन्ट्स प्रालिले तयार पारेको उक्त इआइए प्रतिवेदन सार्वजनिक गरिएको छ ।

उक्त मार्गको वातावरण प्रभावबारे छलफल गर्न आयोजना गरिएको सार्वजनिक सुनुवाई कार्यक्रममा कोरिडोरको कुल दुई सय ५४ किलोमिटर सडक खण्डमा १२.५ हेक्टर वनको क्षेत्रफल पर्ने बताइएको छ । जसमा ५ हजार रुख काटिने प्रतिवेदनमा उल्लेख छ ।
यस्तै सात हजार साना रुख कोरिडोर मार्गमा रहेका छन् । प्रतिवेदनमा उल्लेख भएअनुसार महाकाली कोरिडोर निर्माणका क्रममा चार सय ४६ घरधुरी विस्थापित हुने छन् । करिडोर मार्गमा २०३५ सालदेखि २०७४ सालसम्म बनेका घरको लागत १८ हजारदेखि ४५ लाख रुपैयाँसम्म रहेको छ ।
कोरिडोर निर्माण गर्दा उचित मुआब्जा दिन वा अर्को स्थानमा प्रतिस्थापन गर्न इआइए प्रतिवेदनले सुझाएको छ । पञ्चेश्वर गाँउपालिकामा पर्ने घरबारेको रिर्पोट तयार भइनसकेको परामर्श दाताले बताएको छ ।