स्पेनिस ला लिगा फुटबलको नयाँ सिजनमा रियल मड्रिडले विजयी सुरुवात गरेको छ । लिग अन्तर्गत शनिबार राति भएको सिजनको आफ्नो पहिलो खेलमा रियल मड्रिडले सेल्टा डी भिगोलाई ३–१ ले पराजित गरेको हो ।

रियल मड्रिडको जितमा करिम बेन्जिमा, टोनी क्रस र लुकास भाज्क्वेजले गोल गरे । सेल्टाका लागि लोसाडाले एक गोल फर्काए ।

१२ औँ मिनेटमा बेन्जिमाको गोलबाट रियल मड्रिडले पहिलो हाफमा १–० को अग्रता लिएको हो । अवे मैदानमा भएको खेलमा दोस्रो हाफमा रियल मड्रिडले थप दुई गोल गरेको हो । ६१ औँ मिनेटमा क्रस र ८० औँ मिनेटमा भाज्क्वेजले गोल गरे । सेल्टाका लागि इन्जुरी समयको पहिलो मिनेटमा एकर लोसाडाले एक गोल फर्काएका हुन् ।

सेल्टाका ब्राइस मेन्डेजले पहिलो हाफमा नै गोल गरेका थिए, तर भिएआर मार्फत अफसाइड देखिएपछि सो गोलले मान्यता पाएन।

यो खेलमा रियल मड्रिड दोस्रो हाफको अधिकांश समय दुई खेलाडीमा सीमित भएको थियो । ५६ औँ मिनेटमा लुका मोड्रिक सीधै रातो कार्ड खाँदै मैदानबाट बाहिरिए । डेनिस स्वारेजसँगको च्यालेन्जका लागि लुकाले रातो कार्ड पाएका हुन् । लुका सिजनको पहिलो खेलमा रातो कार्ड पाउन बाध्य भए ।

यो खेलमा ग्यारेथ बेल पनि थिए रियल मड्रिडको टिममा । खेलपछि रियल मड्रिडका प्रशिक्षक जिनेदिन जिदानले बेल रियल मड्रिडमै रहने बताएका छन् ।

ला लिगा अन्तर्गत शनिबार राति नै भएका अरु खेलमा कालोर्काले एइबरलाई २–१ तथा ओसासुनाले लेगानेसलाई १–० ले पराजित गरे । यस्तै भिल्लारियल र ग्रानाडाले ४–४ तथा भ्यालेन्सिया र रियल सोसिडाडले १–१ को बराबरी खेलेका छन् ।