कैलाली ९ जेठ/ भारतको बैङलोर स्थित कल्याणनगर निवासी नागराज रेड्डीको घरमा कार्यरत दुई नेपाली कामदार सहित अन्य तीन नेपाली मिलेर गरेको झन्डै दुई करोड रुपैयाँ बराबरको चोरी गरेका छन ।
बाजुराको बुढीगंगा नगरपालिका–९ जुवापानीका हेमनाथ सिंह र उनकी पत्नी मान्डवी सिंहले अन्य तीन नेपालीको सहयोगमा २१ बैशाखमा नागराजको घरबाट चोरी गरेर फरार भएका हुन् । सिसिटिभी फुटेजमा चार पुरुष रातिको समयमा घरभित्र छिरेको र चोरिएको सामान सहित गाडीमा भाग्ने व्यवस्था मान्डवीले मिलाएको देखिन्छ ।
चोरीको घटनामा सिंह दम्पत्तीका अलावा बाजुरा जुवापानीकै दीपक भनिने जीवन, राजेन्द्र शाही र अछाम सेलागाउँका राजु शाही रहेको भन्दै परिवारले बैङलौरस्थित प्रहरीमा किटानी जाहेरी दिएको छ ।
नागराज परिवारले करिब ५ महिना पहिले हेमनाथ र मान्डवीलाई मासिक १५ हजार भारु र आवास सुविधा दिने गरी कामदारका रूपमा राखेका थिए । रेड्डी परिवारका सदस्य सुदिप रेड्डीले परिवारका सबै सदस्य तमिलनाडुको तिर्थाटनमा गएका बेला घरमा चोरी भएको बताए । उनले भने,’२२ बैशाखको बिहान साढे एक बजे घर आउँदा ढोका र भित्रको दराज फुटेको थियो । कपडाहरू भुईमा असरल्ल छरिएका थिए ।’
घटना लगत्तै परिवारले स्थानीय प्रहरीमा तीन केजी २ सय ५४ ग्राम सुनका गरगहना, १५ केजी चाँदीका गरगहना, पाँच लाख मूल्य बराबरका २३ थान घडी, डेढ लाख भारतीय रुपैयाँ बराबरको विदेशी रकम र ५ लाख भारतीय रुपैयाँ चोरी भएको भन्दै निवेदन दिएका छन् ।
सुदिपका अनुसार चोरीमा संग्लन दम्पती बाहेकका अन्य तीन नेपाली पनि कल्याणनगरमै काम गर्थे । चोरीमा संग्लन दम्पत्तीले नक्कली रासन कार्ड समेत बनाएको देखिन्छ ।
घरमा धनमाल भएको पत्तो पाएपछि उनीहरूले परिवारका सदस्य बाहिर रहेको मौका छोपेर चोरी गरेको देखिन्छ । रेड्डी परिवारले चोरीमा संग्लनलाई पक्राउ गरिदिन भन्दै काठमाडौंस्थित भारतीय दूतावासमा समेत निवेदन दिएका छन् । सोही निवेदनमा आधारमा दूतावासले परराष्ट्र मन्त्रालय अनर्तगतका कन्सुलर शाखा र प्रहरी प्रधान कार्यालयलाई घटनाबारे जानकारी गराएको छ् ।
चोरीमा संग्लन दम्पती भागेर नेपालस्थित घर आएको हुनसक्ने भन्दै जिल्ला प्रहरी कार्यालय बाजुराले समेत अनुसन्धान अगाडी बढाएको छ । जिल्ला प्रहरी कार्यालय बाजुराका डिएसपी उद्धव सिंह भाटले पीडित परिवारका सदस्य चोरको खोजीमा बाजुरामै आएको बताए । घटनाबारे छानबिन गर्न भन्दै प्रहरी प्रधान कार्यालय हुँदै पत्र आएको बताउँदै भने, ’चोरीमा संग्लन भनिएका दम्पत्तीको घरमैपुगेर छानबिन गरेका छौँ ।’
उनका अनुसार दम्पत्तीका बाबुले छोरा बुहारी घरमा नआएको र सम्पर्कमा नभएको बताएका छन् ।
